Stem
Emergency
الاختبار(امتحان القبول) و الشروط
ا- إي شروط المدرسة؟
شروط المدرسة مش ثابتة يعني من ساعه ما مدارس ستيم اتعملت في مصر كانت الشروط ان الشخص يجيب 98% + انه يقفل مادتين من تلاتة (علوم / رياضة / انجيلزي) الشروط دي فضلت زي ماهي لحد 2015 وكمان فضلت كدا في فترة التقديم من سنة 2016 بس حصل تغيير مفاجئ وهو ان المجموع المطلوب 95% بس تقفيل المادتين فضل موجود وفي 2017 الشروط اتغيرت وبقت كالاتي:
1/لو جايب 98% يبقي المفروض تكون مقفل مادة عالاقل من التلاتة
2/لو جايب 95% يبقي لازم تكون مقفل علي الاقل من التلاتة.
والشروط الجديدة في 2018 بقت كالاتي:-
1/الشخص يكونن جايب 98% ويكون مقفل مادة من التلاتة (اللغة الانجليزية - الرياضيات - العلوم)
ب-هنمتحن علي الكمبيوتر ولا ورق في إمتحان القبول؟
علي الكمبيوتر وكلها اختياري.
ت-هناخد إي معانا واحنا داخلين الامتحان؟
هتاخد معاك الة حاسبة وقلم وورق فاضي بس ممكن ياخدوه ويدوك هما ورق ويبقي معاك عصير وحاجة تاكلها في نص الوقت.
ث-إي هي الامتحانات اللي بنتمحنها أثناء القبول؟
علوم و IQو عربي و رياضيات بس ف 2017 امتحنو انجليزي بدل العربي .
ج- أبدأ بإي في إمتحان القبول؟
حسب راحتك بس الأفضل IQ والرياضيات أول حاجه والعربي او الانجليزي ع حسب مايجي خلوه اخر حاجه.
ح- إي هي الدرجة اللي المفروض أجيبها في إمتحان القبول عشان أدخل المدرسة؟
مش ثابتة علي حسب درجة الي بيمتحنوا معاك يعني بتختلف من سنة لسنة علي حسب درجات كل الناس الي امتحنت.
خ- وقت الامتحانات تقسمتها إزاى؟
كل إمتحان بيكون ساعة ما عدا العربى/الانجليزي نص ساعة.
د- طلبو منكم ورق أو فلوس وإنتو داخلين اللجنة ؟
لا طبعا هيبقي معاكو بس أرقام الجلوس بتاعتكم.
ذ-الامتحانات إمتي؟
تابع موقع الوزارة.
ر-هو يوم إختبار القبول بيبقي عامل إزاي (سؤال نفسي شوية)؟
إنت هتروح هتلاقي ناس كتير واقفة علي بوابة المكان اللي إنت هتدخله ولما تدخل جوا ومعاك العصير بتاعك بقي هتلاقي ناس كتيييير واقفة في مجموعات بيراجعو سوا وناس واقفين لوحدهم إنت ماتقفش لوحدك لو رحت كلمت اي حد أو سألته في حاجة هيقولك عادي وقف واتكلم وصاحب في الربع ساعة اللي هتقفهم دول عشان هتتقابلو تاني لما تروحو المدرسة إن شاء الله بس متتوترش خالص وإهدي وعادي جدا إنت تدخل تمتحن وتمشي من غير اي حاجة ولا تفكر هتتقبل ولالا,متخليش اي موضوع يجي في دماغك غير النوم روح نام ولما تصحي إبقي إحسب درجاتك وإوعي تسأل السؤال اللي بيتكرر كل سنة في جروب الراغبون اللي هو : ياجماعة انا جبت مجموع## هتقبل ولا لأ عشان هتاخد كمية تريقة وتحفيل ماحصلتش إنت راقب في صمت وهتلاقي ناس بتسأل الاسئلة دي وإنت في وسطهم هتعرف درجتك حلوة ولا وحشة من غير ماتتكلم.
ز- إمتحان القبول بيبقي عامل إزاي وجاي من منهج اي؟
الامتحان بيبقي علي جهاز كمبيوتر بتمتحن أربع امتحانات كل إمتحان لوحدو وليه وقت مخصص , لو الوقت خلص الكمبيوتر بيقفل الامتحان ويحسبلك الاسئلة اللي إنت خلصتها ، إمتحان العربي بيجيلك قطعتين ويسألك في معاني وممكن إعراب وممكن إسالة عن مواطن الجمال لو انجليزي ف السنة اللي فاتت جاب 40 سؤال منهم 10 جرامر وقطعتين عليهم اسئلة وهو محتاج بس ثروة لغويه اما إمتحان الرياضيات والعلوم هتتسأل اي سؤال ممكن تتخيل انه يجيلك من كل اللي درسته من أول أولي إعدادي لو كنت دحيح رياضه ف اعدادى إطمن شويه. أما الIQ ده تقريبا إمتحان تسلية أسألة مش من المريخ بتبقي عايزة تركيز شوية بس أهم حاجة تبقي سريع.
س- هو لو الامتحان جالي فيه عربي ممكن أذاكر لنظام الامتحان ده منين؟
بص هو إمتحان ملوش مرجع يعني بيسأل في معاني في إعراب في كذا حاجة ومعتقدش هترجع تحفظ كل المعاني اللي غنت خدتها في العربي طول حياتك هو بيعتمد علي ثروتك اللغوية بس إنت ممكن تقرا قصص باللغة العربية تعود نفسك شوية تحلل الجمل دي معناها اي وكدة وإن شاء الله هتتعود.
ش- هي اي شروط إني أقدر أقدم في المدرسة ؟
الشروط الجديدة هي انك تجيب مجموع 98% وتقفل مادة من الانجليش والعلوم والرياضيات بس الشروط دي مش ثابتة بتتغير كل سنة بس اللي ثابت ان متكونش رسبت قبل كدة وسنك ميعديش 17 سنة.
ص-هو انا ممكن أدخل ستيم وأانا ناقص نص درجة علوم وربع رياضيات ؟
الوضع الوحيد اللي ممكن تخش فيه ستيم لو مش محقق شرط المجموع أو تقفيل المادتين إنك يكون معاك براءة إختراع معتمدة من أكاديمية البحث العلمي pacman تخش علي طول مش مهم المجموع.
ض- دلوقتي إمتحان القبول دا أذاكرله إزاي؟؟
هو المفروض بتذاكر المناهج علوم أو رياضة كقوانين وتعريفات من 4 إبتدائي لحد 3 إعدادي بس مش دح والعربي /الانجليزي معتمد علي الثروة اللغوية وكمية المعاني والمفردات اللي إنت عارفها والاي كيو سهل جدا فيه كذا موقع أو أبليكيشن أوكتاب زي الامثل بيدرب علي حل الاي كيو.
ط - في كورسات بناخدها قبل إختبارات القبول؟
في مدرسين بيدو محاضرات في كذا مكان بس الموضوع مش مستاهل.
ظ - هو أنا لو خلصت إمتحان في وقت أقل من وقته أقدر أستثمر الوقت ده في إمتحان تاني؟
للأسف مش هينفع كل إمتحان ليه وقته والكمبيوتر بيبقي فيه تايمر شغال.
ع- هو إمتحان القبول فيه كتابة ولا كله إختياري؟
كله إختيارات.
غ-هل مسموح إستخدام الالة الحاسبة في الاختبار وينفع اخد معايا ورقة وقلم ولا مينفعش؟
كله مسموح.
ف-هو اختبارات القبول بتبقي كلها في يوم واحد ولا كذا يوم؟
كله في نفس اليوم.
ق-أنهي الاكثر أهمية في إمتحانات القبول العلوم ولا الرياضة ولا العربي ولا الIQ ؟
كل الامتحانات ليها نفس الاهمية بس العربي نسبته قليلة طبقا لنسبة القبول دي ------- نسبة مجموع الاعدادية ×40 + نسبة مجموع الدرجات في إختبارات العلوم والرياضة والاي كيو ×40 + نسبة درجة إمتحان اللغوي ×20 , الكل ÷ 100 .
ك- هى المدرسة هاتقبل كل اللى مقدم ومنطبق عليه الشروط ولا بتاخد عدد معين ؟
عدد معين بيكون من أعلى الناس اللى محققة الشروط وبعد الاختبار بتاخد من أعلي الناس الي جايبه أعلي الدرجات في إختبار القبول.
ل- عايزة أتاكد الطالب بيروح المدرسة حسب توزيعه الجغرافى ولو تفوق فى الاختبار يكون له فرصة لاختيار مدرسة ستيم أخرى حسب رغبته ولا كلام ؟
لو تفوق فى الاختيار بيروح المدرسه حسب توزيعه الجغرافى لكن لو جاب مجموع أقل بيروح لمدارس مش تبع توزيعه الجغرافى يعنى مثلا لو حد فى البحر الاحمر وجاب مجموع كبير هيدخل مدرسة البحر الاحمر جاب مجموع أقل من اللى بتقبله مدرسة البحر الاحمر الوزارة هتعرض عليه مدارس تانيه يختار منها تكون بتاخد من درجات أقل زى المنوفية أو الغربيه مثلا اللى بيحدد الدرجات اللى هتاخدها المدرسه نسبة معينة من درجات إمتحانات القبول وبرضه على حسب المقاعد الخاليه فيها.
م- إزاي أجيب إختبارات قبول باللغة الانجليزية؟
بتبقى ف الاختيارات وإنت بتمتحن عالكمبيوتر عربي أو أنجليزي اللي أنت عايزه.
ن- اي شروط السنه دى 2018/2019؟
لو جبت 98% فيما فوق وتقفيل مادة من (الرياضيات-العلوم-اللغه العربية).
ه- هي درجات إختبارات القبول بتتحدد ع أساس اي يعني اللي معدي ٥٠٪ يعدي ويدخل المدرسة ولا اي؟
لا ع حسب المجموع بتاع كله وبيبداو ياخدوا أعلى مجموع ف عدد معين.
و- دلوقتي أنا ليا ف الحفظ والفهم بس مش عارف أحدد قدرتي أكبر ف اي...بعرف أحل أسئلة ذكاء بس أكيد في مش بعرف أحله كله وبمل بسرعه فانا مش عارف أدخل ولا لأ...يعني هل لو أنا دخلت هنشط وأستريح فيها ولا اي؟
كلنا بنحفظ وبنفهم عادى جدا بس لازم تدرب نفسك إنك تفهم بس لان ستيم مفيهاش حاجه إسمها حفظ ودرب نفسك حاليا ع إختبارات الذكاء عشان تعرف تحلها أكتر وتفهمها لانك لو معرفتش كدا خلاص لكن لو قبلت عادى تدرب نفسك عالفهم.
ي- أنا كنت إختبرت في السفاره المصريه في السعوديه ...هل أنا ممكن أتقدم في المدرسه علما إني كنت قفلت جميع المواد عدا اللغة العربية تقدير 98.6%؟
أيوه ينفع للناس اللى إمتحنت ف السفاره.