ا-اي نظام التنسيق والنسبة المرنة ؟

 النسبة المرنة إنهم بيقسموا عدد طلاب ستيم "البسط" على عدد الطلاب فى الجامعات اللى الوزارة معتمداها فى القرار الوزارى"المقام"

الحاجات الجديدة اللى بتحصل إنهم بيقللوا عدد الجامعات يعنى كل تخصص لوحدة فدا هيدي فرصة أكبر للطلاب إنهم يدخلوا جامعات حكومية لان النسبة بتزيد كمان بيبقى فيه إتفاقات من الوزارة والجامعات الخاصة إنهم يقدموا منح لينا وبرضة فيه حاجة أسمها جبر الكسر حتى لو كان بسيط يعنى لو ناتج القسمة طلع 1,6 يبقى يترفع ل 2 وبرضة فى قرار إن يبقى فيه على الاقل طالب اللى إنت منهم STEM فكل جامعة من الجامعات المعتمدة .علشان تدخل طب هيتقسم عدد طلاب اللى من العام على عدد الناس واللى هيفرق بينكم المجموع الاعلى فعلى حسب إنت دفعتك مستواها اي . لو بقى جامعة خاصة يبقى هى اللى هتتحد النسبة بس طبعا يبقى أقل من ثانوى عام.

 

ب-اي هو نظام التنسيق؟

إحنا تنسيقنا غير العام خالص يعني إحنا مش بندخل غير كليات القمة اللى هما (طب/ طب أسنان/ علاج طبيعي/ صيدلة/هندسة/ كلية علوم/ حاسبات ومعلومات) طب نظامنا فيهم اي؟ كالاتي...
النسبة المرنة: وديه بتبقى نسبة دخول طلاب ستيم للجامعات الحكومية وهي إختلفت كل السنين عن سنة 2017 في الاول كانت بتتحسب كدا....
عدد طلاب ستيم علي عدد اللي داخلين طب من عام (مثلا) مع جبر الناتج يعني 3/1000 يبقي مقابل كل 1000 واحد يدخل طب من عام 3 هيدخلوا من عندنا ودي مش نسبة وحشة خالص بس الوحش إننا كنا مرحلة تالتة وده كان مبيخلناش نقدم في الكليات العسكرية.
طب دلوقتي التنسيق إتغير تماما إزاي؟؟؟
 النسبة المرنة بقت تتحسب بطريقة تانية وهي إن كل جامعة بقت علي حدة.  برده يعني اي؟؟
يعني دلوقتي جامعة عين شمس هتاخد 1200 طالب وإحنا عددنا 200 طالب يبقي هنقسم 200/1200 يبقي العدد 6 يعني 6 من ستيم هيخشوا عين شمس

.

 طب بالنسبة للمرحلة؟؟

بقينا مرحلة تانية يعني فرصة إننا نقدم في كلية عسكرية زادت
لا ومش كدا وبس إحنا فرصة المنح عندنا أكبر يعني بيجلنا عدد كبير من المنح من جامعات زي (جامعة النيل/ جامعة زويل/ِ الجامعة الامريكية)وجامعات تانية ودول مختلفة مثلا زي (أمريكا/ ألمانيا/ اليابان) ودول تانية.

​

ت- اي هي المنح الي بتجيلنا؟

بص المنحة الاول دي إن في مؤسسة أو دولة أو حكومة أو حتي جامعة بتديك فلوس علشان تدرس في مكان معين يعني مثلا إنت عايز تسافر أمريكا بس حالتك المادية مش مساعداك وبرغم كدا أنت متفوق وكويس جدا فمثلا أمريكا بتعمل جزء من فلوسها للطلاب ديه علشان تقدر تكمل دراستك في المكان الي أنت عايزة.
والمنحة دي نوعين:

منحة جزئية :ودي بتبقي مبلغ معين من المال بتاخدة أو بيدفعلك مصاريف التعليم يعني مثلا جامعة زي جامعة هامبورغ دي مصاريفها كتير بس إنت نفسك تدرس فيها ف أمريكا بتخليك تدرس فيها علي حسابها بس إقامتك وحياتك بتبقي عليك إنت مش علي أمريكا يعني هي مسؤولة عن دراستك بس.
المنح الكلية: ودي بقى إنت متدفعش جنية واحد يعني سفرك وأكلك وإقامتك ودراستك بتبقي تبع المنحة 
بس طبعا المنحة بيبقي ليها شروط بس بتختلف من منحة لمنحة يعني منح بتطلب منك درجات معينة في الثانوي و بتطلب إنك تمتحن إمتحانات معينة بس كل المنح مشتركة في حاجة وهي إنك بعد ما تاخد المنحة تفضل متفوق ومستواك ميقلش.
كل الكلام ده منح خارجية أو منح من مؤسسة طيب في بقى منح داخلية من جامعات زي جامعة النيل أوجامعة زويل أو الجامعة الامريكية بتبقي تقريبا نفس المنحة الجزئية لانك مش هتحتاج غير الدراسة لانك بتدرس جوة مصر يعني مكان أقامتك أصلا.

ث- هل أقدر أدخل كليات أدبية من ستيم ؟
أه بس بييقي بتنسيق الثانوية العامة.

ج- دخول جامعة زويل بعد المدرسة ايه ؟
جامعة زويل بتقدم ل ستيم منحة إن أى طالب بيدخل الجامعة لو كان خريج ستيم بيبقى من 80%فى حين الطالب الثانوى من العام بيبقى من %96.

ح- فى تالتة ثانوى ستيم لو حد جاب 50% يدخل اي ؟

هيدخل علوم أو حاسبات لان هم أقل حاجة فى ال7 كليات.
 

خ- ماهو مستقبل الخريج من ستيم؟

خريجي ستيم ليهم 7 كليات ممكن يدخلوها بالنسبة المرنة وكل الجهات العسكرية متاحة ولوعايز تدخل أي كلية برة غير 7 دول بتدخل بمجموعك.

 

ذ- هو ينفع في تالتة ستيم لو مجموعي مجبش الكلٌية اللى أنا عايزها و أدخل خاص؟ 

 

ينفع طبعا

 

  ذ-طيب يعني دلوقتي النسبة المرنة هتقل يعني و هنتظلم كلنا بما إن عددنا كتر أوي دلوقتي و مش

هنعرف نخش طب و هندسة و كلنا هنخش علوم ؟

 

حقيقي محدش عنده إجابة للسؤال دا و المثير في ستيم  إن الامور مش كلها مستقرة و كل سنة تغيرات بتحصل. في كل دفعة بتتخرج بتبقي الاولي في تجربة حاجات كتير و دا الحلو عندنا إنك بتاخد المغامرة  و مفيش حاجات كتير تقدر تضمنها فكل محركك إنك تكمل في المدرسة هو حبك فيها و ليها و إيمانك فيها و في نفسك و إنها أحسن حاجة ممكن تحصلك في حياتك و أنك تقدر تتخطي الصعوبات دي .

أما بقى بالنسبة للحوار دا أمره سهل هي أسمها نسبة مرنة  يعني علامة كسر فوقها و تحتها حاجتين بتتغير

طيب النسبة المرنه بتتعمد علي ايه ؟؟؟ بتعتمد  علي نسبة الخرجين في السنة بالنسبة للخرجين الثانوية العامة و بتتفرع علي كل كلية و نسبة اللي ليهم فرصة يدخلوها ف مظنش زيادة أو قلة العدد هيغير حقيقة إن مثلا متوفر مقاعد في طب من 20 ل 25 من عدد الخريجين من ستيم و هكذا يعني والله أعلم بس أنا لو مكانكوا السنادي كنت هكمل عادي مفيش حاجه هتخليني أسيبها غير و أنا خريجه منها.

 

 

​

​

​

​

​

​

​

​

​

​

​

​