Stem
Emergency
المواد ونظام المدرسة ونظام المذاكرة
ا- بالنسبة انى كنت عربى هل هاتأقلم مع النظام بالانجلش ؟
- الموضوع بسيط ومش صعب وهتتاقلموا عادى .. فالاول الموضوع ممكن يبقى مش لطيف شوية .. معظمنا بياخد حوالى شهر ونص بالكتير أووى وبنتعود .. وبعد كدة بيبقى الموضوع كويس مافيش مشاكل بالعكس مش هاتحب المذاكرة بالعربى وفيها متعه كمان.
ب- اليوم ماشى إزاى ؟
- اليوم بيبدأ الفطار من 6.30 الى 7.15 أو من 10:20 في معظم المدارس الي 10:55، من 7.15 ل 2.45 وفي مدارس من 8 ال 2:30 في مدارس اليوم الدراسى بيضمن الطابور و 5 سيشنات وإتنين بريك، من 3 الى 4 الغدا … من 4 الى 8 ده وقت يخصك تعمل فيه اللى إنت عايزه.. من 8 الى 9 العشا .. من 9 الى 12.30 ده وقت يخصك .. 12.30 السكون.
ت- في إمكانية تحويل من مدرسة لأخري؟
اه فيه بس بالعافية.
ث-اي هو نظام الاقامة والمدرسة؟
نظام الاقامة بيختلف من مدرسة لتانية يعني عندك مثلا أكتوبر عبارة عن 3 مباني واحد أولي وواحد تانية وواحد تالتة وبيبقي 3 أدوار وكل دور متقسم لغرف وكل غرفة بيبقا فيها 3 وكل مبني فيه مطعم
وكمان فيه مبني الدراسة وده عبارة عن فصول ومكتبة وغرف للمدرسين + المعامل وديه لوحدها تماما وهما معمل فيزيكس وواحد كيمستري وواحد بايو وواحد جيو وواحد ميكانكس وواحد موسيقي و 5 فاب لاب.
ج-الدراسة عاملة إزاي زيها زي العام ولا لأ:
لا احنا مختلفين عن الثانوي في حاجات كتير بص نمشي نقطة نقطة
1/ احنا معدناش كتب إاحنا بنذاكر من علي النت أو من مراجع عالمية
2/ مفيش حاجة إسمها المستر الي بيشرح إحنا الي بنشرح لنفسنا يعني بنتقسم جروبات وناخد درس معين ونحضره ونفهمه لزمايلنا والمستر واقف بيسمع زيه زي أي حد ودوره إنه يصلح معلوماتك لو فيه حاجة غلط
3/ مناهجنا غير الثانوي العام بنبقي خليط من منهجهم بس مش زيه بالظبط هيا بالاصل منهج امريكي.
ح-اي هي المواد الي عالينا؟
1-Geology, Math, Physics, Chemistry, Arabic, English, Biology, Social studies, German(french), Mechanics, It(information technology) .
خ-المجموع بيتقسم ازاي؟
علي حسب كل سنة يعني سنة اولي 60% كابستون / 10% غياب وسلوك / 30% مواد وسنة تانية نفس الكلام.
د-طب اي نظام الامتحانات في المدرسة:
عبارة عن ورقة اسئلة فيها كل الاسئلة إختر وورقة تانية فيها إختيارات بس ومترقمين وإنت بتشوف السؤال في ورقة الاسئلة وتجاوبه في ورقة الاختيارات ومتزعلش لما تجيب درجة قليلة لان الامتحانات بتبقي صعبة بس هتستفيد منها جدا وهتخلي تفكيرك يتغير تماما.
ذ-هو أنا هعرف أبحث عالنت وأذاكر لوحدي:
أكيد طبعا هتتعود علي كدا معظمنا دخل وهو متعود علي الدروس والشرح من المدرسين بس أنت لما تدور بنفسك عن المعلومة وتفهمها لوحدك بتثبت أكتر والموضوع ده بيساعدك في حياتك الشخصية في إنك بتعتمد علي نفسك وتقدر تحل المشاكل اللي تقف قدامك من غير مساعدة حد.
ر-ينفع أذاكر مع صحابي؟
بص إنتو هتذاكروا أصلا معظم الوقت مع بعض وهتشرحوا لبعض عالطول وهتقسموا كمان المنهج بينكوا وتشرحوه لزمايلكوا في الفصل يعني هتبقوا متعاونين جدا.
ز-- نظام الدراسة في الفصل عامل إزاي (الشرح وكدا ) والبريزنتيشن بيبقي في اي؟
إحنا في الفصل بيبقي عندنا حصة كأي حصة دراسية معتادة تمام ، لكن النظام مختلف من حيث إننا كفصل بنبقا متقسمين جروبات ، وكل جروب بيبقي عليه تنظيم شرح السيشن مرة.. يعني في الحصة بيبقي في جروب عليه التنظيم فبيقسم الشغل عليه كله ويجوا يعملوا بريزنتيشن قدام الفصل ، اللي هو بيكون لامم الجزء المسئولين عن شرحه وليكن في درس عربي هيشرحوه بيجيبوا المعاني المهمة, الشرح بتاع الدرس , الاسئلة المهمة يحطوها في slides ويشرحوها كلهم كل واحد عليه جزء والمدرس قاعد بيصحح اي أخطاء ويزود أي نواقص ويراقب الشغل ويقيم.
س-- هل المدرسين بيساعدونا في السيرش الأول ويفهمونا ولا هيسيبونا تايهين ؟
لا في الاول هيساعدوكوا جداً ان شاء الله وهيفهموكوا الدنيا ماشية ازاي مش هتوهوا يعني حتي لو مثلاً مفهمتوش الدنيا من المدرسين فطلبة تانية هيقوموا بالواجب وزيادة معاكم الحقيقة ومرة في مرة هتتعودوا جداً.
ش--عدد طلاب كل فصل ؟
من 20 ل 25 طالب.
ص- هل بنستخدم المعامل وكدا فعلا هناك وبنعمل التجارب ؟
اه الوضع مختلف عن الاعدادي وبتشوفي التجربة قدامك وبتجربيها وبتدخلي المعامل وبتشتغلي فيها.
ض- اي اللى بيميز المدرسة عن غيرها؟
-المدرسة مميزة لانها نظام تعليمى جديد جدا وفعال حيث إنه بيعتمد ع الطالب وبيشيل فكرة الحفظ فى المناهج دى خالص وتطبيق اللى انت بتدرسه فى حاجات عمليه فى كابستونك دا بيساعد انك تستفاد بكل حاجه قدامك غير إنه نظام تعليمى عالمى معترف بيه فى العالم كله والمناهج أمريكيه ف عقلية الطالب نفسه بتتغير بعد دخوله للمدرسة وبتفتح طريق للطالب إن هو يدور ع منح للخارج وفى منح مخصوصه بتيجى لطلاب ستيم فقط.
ط- إحنا اللى بنشترى فلاشة النت ولا فى نت فى المدرسة ولا بيدونا فلاشة مع اللاب ؟
-لا انت اللى بتجيب فلاشة دا لوكنت محتاجها لان المدرسة والسكن بيكون فيهم نت بس ساعات بيهنج وكدا ف يستسحسن تجيب فلاشة نت معاك.
ظ- اي الكتب الخارجية اللى أقدر أجيبهم ؟
ممكن تجيب كتب العربى والدراسات والانجلش لان دول زينا زى عام بالظبط الا الانجلش بيكون فى منهج زياده.
ع- اي اللغات التانية المتاحة فى المدرسة؟
-المانى وفرنساوى بس.
غ- اي الuniform للولاد والبنات ؟
-للولاد بيكون بنطلون جينز أو اى حاجه بس كحلى وتيشيرت أزرق والبنات بنطلون أو جيبه كحلى وتيشرت أو بلوزه بينك.
ف- فى اى سنة بيتخصص الطلاب علمى رياضة أو علوم ولا الاتنين مع بعض ؟
-لا مش مع بعض طبعا انت بتحدد علمى رياضة أو علوم فى سنة تالتة.
ق- الدراسة كلها بتكون إنجلش أو الكتب ؟
-طبعا الدراسة كلها انجلش وكل المراجع اللى فى المكتبه إنجلش (ماعدا العربى والدين والدراسات ) وبتقدم الكابستون بتاعك انجلش.
ك- هو كل ترم بندرس مواد معينة ولا كلهم في نفس الترم؟
كلهم في نفس الترم طول ال3 سنين وتالتة ع حسب تخصصك.
ل-ماهى مدارس ستيم واي فكرتها ؟؟
المدرسة إختصار ل Science Technology Engineering Mathematics يعنى مفيش حاجة إسمها مدرسة زويل عشان نبقى متفقين هى إسمها مدرسة المتفوقين ف العلوم والتكنولوجيا أو ستيم
المدرسة أصلا نظام أميركى مطبق ف أمريكا من سنين...... وهى عبارة عن منحة مقدمة لمصر من USAID الدراسة فيها مبنية ع البحث العلمى ومعتمدة إعتماد كلى ع الطالب بحيث إن الطالب بيكون عنده منهجه ويبدا هو بحث فييه ويجمع معلومات وممكن يستعين بالمدرس لو ف حاجة مش فاهمها لان دور المدرس بيكون إنه يصحح المعلومة ويتاكد إن الطلاب فاهمينها بالطريقة الصح ...... منهجها غير محدد بمعنى أصح مفتوح وبيدى حرية للطالب إنه يتعمق ف الجزء ال حابه أو شغوف بيه..... الدراسة طبعا بالانجلش بناخد معظم المواد العلمية من أول سنة غير ثانوى عام بالاضافة لمواد الوزارة ( عربى- دراسات دين-لغة تانية- انجلش) ...... درجاتك بتبقى متقسمة ع المواد و الكابستون ( المشروع ال بتعمله كل ترم ) وبيبقى عليه 60% والمواد 40%.
م- هعرف أدرس بالانجلش لو أنا من مدرسة عربى؟؟
من الطبيعى إن الواحد مش بيتعلم حاجة غير لما يتعود عليها ويجربها يعنى مثلا الطفل أول ما بيتولد بياخد سنة وإتنين وتلاتة عشان يبدا يتكلم ولو حطيت الطفل دا بين ناس بتتكلم عربى فبالتالى هيطلع بيتكلم عربى ولو حطيته بين ناس بيتكلموا إنجلش هيتكلم إنجلش معنى كدا إن الحكاية جاية من التعود والتكيف مع الجو ال حواليك...... حتى ال جايين من لغات بياخدوا وقت علشان يتعودوا بردوا لاننا زى ماقلنا المنهج معظمه أميركى ..... وإنت أول ما بتدخل المدرسة بتاخد أسبوعين سامركامب دا بيبقى كله سيشنز إنجلش وتعريف ع المدرسة ومعاملها علشان تتعود ع المكان واللغة وبعدين تدخل ع الدراسة ال هى كلها بالانجلش ف إنت هتكون إتعودت شوية وشوية كمان هتلاقى نفسك بقيت فل وأمورك تمام مش هيبقى عندك عقدة اللغة دى إن شاء الله.
ن- بنروح المدرسة إزاى وبنرجع كل قد اي ؟؟
بتبقى فى أتوبيسات تبع المدرسة بتقف ف أماكن معينة المدرسة بتقول عليها زى مثلا المحطة بتوديك وتجيبك .... أجازتك كل أسبوع خميس وجمعة وسبت وممكن لو فى طلبة مغتربين مش بيروحوا كل أسبوع عشان تعب السفر وكدا ف بيقعدوا ف السكن خلال الاجازة وبيبقى معاهم بردوا المشرفين والامن وشيف المطعم.
ه- اي مميزات المدرسة؟؟
المدرسة بتديك نظرة أوسع عن معظم المجالات ودا من خلال المنهج المفتوح فبالتالى بيبقى عندك خلفية أكتر عن المجال اللى إنت حابه , بتكون علاقات جديدة من خلال التعامل مع ناس مختلفة ومن بلاد مختلفة ودكاترة جامعة فبالتالى بتكتسب مهارة ف التعامل مع أنواع الناس المختلفة, تركيزك مش بيكون مقتصرع الدراسة والمواد بس لانك من خلال التوسع دا ممكن تقدم ع مسابقة أو منحة من الاخر إنت كدا بتكون إكتسبت مهارة علمية من خلال منهجك المفتوح وعملية من خلال شغلك ف الكابستون والعمل ف فريق جماعى وإجتماعية من خلال اختلاطك مع ناس مختلفة من بيئات مخلفة وأعمار مختلفة.
عيوبها؟؟
مشكلة التنسيق طبعا واللى جارى البحث عليها والعمل ع تحسينها إن شاء الله , والله أعلم اي ال ممكن يجد ف المدرسة بعد ما المنحة خلصت وبقت المدرسة تحت مسئولية الوزارة تماما , أحيانا مش كل المدرسين بيبقوا كفء أعتقد مشاكلها محدودة بس الوزارة لو وفرت المناخ والبيئة المناسبة للطلبة وساعدت ع حلها فعلا هنتخرج وإحنا متعلمين صح فعلا ونقدر نفيد نفسنا وبلادنا.
و-إمكانيات المدرسة والاجهزة والمعامل بتاعتها علي اد المستوي ولا لا؟
طبعا علي اد المستوي كل أجهزتها جاية من أمريكا
ي-المواد تقيلة ولا علي اد الترم ؟والدراسة بتبدأ و تخلص مع العام؟
لا تقيلة حبة بس لو نظمت وقتك من أول الترم مش هتحس بتقلها.
بنبتدي مع العام بس الامتحانات ممكن معادها يختلف يعني ممكن تمتحن بعد العام بكام يوم كدة.