اليوم فى المدرسة بيمشى أزاى
أنا بصحى ع الساعة 6 كدا  بعد الصلا وبعد ماصحى زمايلى اللى فى الاوضة وخلافه بتكون الساعة بقت 6 ونص أنزل على المطعم الفطار بيبدأ من 6 لحد7 طبعا الهزار مع الصحاب والضحك بناخد نص ساعة فى المطعم بعدين كلنا كدا نكون سمعنا صوت الجرس نروح نقوم على الطابور .  بنبدأ بالتمارين طبعا ووقفة الطابور وبنحاول منقفش فى الشمس لو كنا صيف أو ندور عليها لو كنا شتا بعدين الاذاعة بتاخد حوالى ربع ساعة أو أكتر شوية وبرامجها الممتعة جدا غالبا بيكون فى فقرة ضحك أو فقرة تحدى بين ولاد وبنات فى أسئلة والاذاعة بتكون على كل فصل يوم وبراحتكوا يعنى عايزين تحضروها أنجلش تمام أو عربى تمام. الساعة 8 الا عشرة كدا تحية العلم وبعدين تطلع بقا عشان تاخد أول سيشن عندك !!!! ودا بقا أنت وحظك ممكن يصدمك من اليوم كله أو يفتح نفسك على اليوم كله لو لحد البريك الاول, المهم لو أى مادة أدبية غير الانجلش ف دى غالبا بتكون ملل يعنى وقت السيشن ساعه وتلت يعنى 80 دقيقة كل مستر وتقسيمة بقا للسيشن بتاعته يعنى مثلا عندنا فى سيشن الماث وقت السيشن بيكون أول 10 دقايق المستر بيتكلم فيهم بيقول أحنا هندرس ايه الاسبوع ده (أعتبار أننا يوم الاحد أول الاسبوع) وممكن يوزع الاوت كمز علينا بعدين يقوم التيم اللى عليه الدور فى الشرح وبيكون طبعا محضر بريزنتيشن كويس يشرح منه وأسئلة على اللى بيشرحه فممكن ياخد ساعة الا ربع فى الشرح والمناقشة وكدا.و لما نختلف عن حاجة المستر يقوم يوضحها لينا بيكون فى وقت ريست فى النص كدا حوالى 5 دقايق. باقى الوقت تقريبا ربع ساعة بيكون لحل الاسئلة جماعيا مع بعض وهنا بقا بكتشف انك فمهت جزء حلو من الدرس والجزء التانى لسة عايز شغل ف بدون كل اللى بيتقال فى السيشن عشان متنساش حاجة. يخلص أول سيشن بخير تدخل بقا ع السيشن التانى بعد 5 دقايق أنتقال بين الفصلين وخلينا نقول مثلا أنه كميسترى سيشن الكيمسترى بيتقسم نصه بيكون شرح نظرى والجروب اللى عليه الدور بيشرح وكدا والنص التانى بيكون للميس أو المستر ودا فى أوقات كتير بيكون عملى فى المعمل اللى بيكون متجهز طبعا من أمين المعمل معمول حساب كل تيم وقدامه كل أدواته. بيتم الشرح قدامك وأنت بتنفذ كل اللى أخدته نظرى بتفهم كل حاجة لان كل حاجه بتعملها لوحدك اللى بتعمله مش بتنساه بس لو السيشن ممكن يتعمل عملى. لو هو قوانين وبس فبتاخد النص التانى حل اسئلة خلينا نخلص السيشن دى بقا عشان نروح للسيشن التالت واللى قبل البريك وخلينا نقول ان هو سيشن دراسات ... سيشن الدراسات ده بقا تقريبا السيشن الوحيد عندنا فى البحر الاحمر اللى بيطلب منك تفتح اللاب وتبحث أثناء السيشن بنقسمه أزاى: أن الميس بتبدا تعملنا تيمات جوه الفصل وبتقسم الدرس علينا وأحنا قاعدين, وبنبدا نعمل بريزنتيشن ونذاكر كلنا الدرس اللى هيتشرح فى نفس السيشن بس كل تيم جزء من الدرس وكلو بالوقت مش بتحس بالوقت عشان أنت شغال  وبتبحث وكدا عشان يجى البريك الساعة 11 بتحس أنك فى المدرسة من بدرى جدا بتقابل أصحابك بقى غالبا بيكون فى لعب كورة أو ماتش فى الدورى المدرسى للولاد أو دورة تنس للبنات , بتهزرو تضحك بتغير جو عشان الساعة 12 الا تلت تروح ع السيشن الرابع واللى قبل الاخير خلينا نقول أن هو فيزيكس فى سيشن الفيزيكس بقا يبدأ 12 الا ربع 12 الا عشرة لو أتاخرت بتتخصم منك درجات المستر متحفظ جدا يعنى لو فتحت اللاب وهو مطلبش منك ده بتنقص لو مسكت الفون ومستأذنتش منه بتنقص فخليك حريص جدا. السيشن بيدأ كالعادة بالتيم اللى عليه الدور فى الشرح بيكون محضرين نفسهم أتنين مثلا هيشرحوا كل واحد جزء والتيم بردو بيحدد هيشرح أنهى جزء فى الاوت كم دى عشان فيه 2 سيشنز فى الاسبوع للفيزيكس بنحدد الاوت كم ده يخلص ع كام أسبوع ع أعتبار بيكون فى واحد منهم عملى, أو بتقسم كل سيشن يكون فيه 20 دقيقة عملى على حسب رغبة الفصل أحنا كنا نفضل يكون فى سيشن عملى نعمل فيه كل التجارب اللى علينا عشان ناخد راحتنا وبنفهم حاجا كتير كانت واقعة مننا فى السيشن . يخلص السيشن الرابع عشان نروح للسيشن الاخير غالبا بيكون عربى دا بقا المستر مريحنا يعنى مش بيخلينا نحضر أو نعمل حاجة هو بيقوم بشرح المنهج كلو بس تكون مركز معاه لانه فى أى وقت فى السيشن بيعمل أختبار مفاجئ عشان يشوف مدى استيعابك ودا بيكون ملل جدا طبعا عشان مفهوش شغل وكدا بتخلص اليوم الدراسى المتعب ع الساعة 3 كدا عشان تروح ع  المطعم للغدا طبعا بيكون زحمة جدا بتضحك كتيير جدا مع كل صحابك فى الدفعة. بتتغدى وبتحكى وبتعمل كل حاجة الساعة 4 كدا يبدا المطعم يقفل بقى فبتقوم عشان تروح تصلى وتغير ومعظم الناس بتحب تنام ساعتين كدا عشان تعرف تواصل وفى ناس بتحب تبدأ مذاكرة ع طول فى صالة المذاكرة. مثلا هنذاكر ساعة كدا اللى اخدناه النهاردة بتنزل السوبر ماركت فى نص ساعة كدا عشان تتمشى وتفوق وتغير جو بتيجى تكمل كمان ساعة ونص كدا مذاكرة قبل م تقوم تصلى المغرب جماعة, فى السكن عاملين جزء للصلاة. يكون عندك بقا أجتماع كابستون مع التيم بتاعك بتلف بقا ع الاوض تصحى العيال اللى نايمة ولسه مصحيوش عشان تبدأ أجتماع, فعلا بيكون كلام مهم فى كوميدى يعنى بتهزر وتضحك وفى نفس الوقت بتفكر وتبحث مع ناس أكتر من أخواتك عشان الساعة 8 تخلص الاجتماع ده وتروح تتعشا ,العشا من الساعة 8 للساعة 9 .بتيجى بقا ممكن تلعب كورة تحت شوية أو لو معاك حاجات بتحضرها عشان تشرح بكرا بتحضرها مع زمايلك اللى هيشرحوا معاك وبتحصل كتير أنك متفهمش جزء فى اللى بتذاكره ف بتروح لحد من الدفعة الاكبر منك عشان يفهمهالك المساعدة أهم حاجة. عندنا فى النص بقا أنت وبتذاكر وتسمع صوت العيال بتغنى وتضحك عشان تكتشف أنهم متجمعين كلهم فى أوضة واحدة وبيسمعوا فيلم مثلا رعب أو مشغلين أغانى وقالبين السكن وتسمع صوت المشرف بيزعق تروح تضحك معاهم شوية و تهزروا. الساعة 12 بتكون جبت أخرك طبعا ف بتنام عشان تحضر اللى محضرتوش بكرا فى المكتبة اثناء البريك
-
-
-
هنتكلم شوية عن باقى السيشن اللى عندك مثلا لو فى أنجلش دا بقا بيكون السيشن كلو أنجلش 80 دقيقة فى أوروبا مفيش حد بيطنق عربى المستر بيكون عامل خطة للسيشنز مثلا لو دى سيشن أستماع تلاقى المستر بيشغل فيديو ما بالانجلش طبعا بتحاول تفهم بيقول اي بس كالعاده مدى استيعابك لفيديو 30 % بتركز أكتر المستر بيعيد الفيديو تانى فأستيعابك يوصل ل 70% هنا بقا المستر يبتدى يوزع عليك ورق فى اسئلة ع الفيديو بتاحول تحل اللى سمعته بتسيب كام سؤال المستر بيكون محدد كام كلمة جديدة عليك فى الفيديو بتبحث ع الكلمة وع معناها بتدخلها فى جمل عشان المستر يعيد الفيديو لاخر مرة قدامك بيكون مدى استيعابك وصل أكتر من 95 % من الفيديو بتكمل باقى السيشن فى أنك بتعمل أكتيفيتى فى السيشن بينك وبين زميلك بتتكلم بالانجلش عن موضوع المستر بيحددوا عشان تزيد الثقة بنفسك فى اللغة "
سيشن البايو أو الاحياء
تحسها أطول سيشن بتاخده لان تقريبا معظم السيشن بتسمع للشرح ولو مكنتش محضر مش بتفهم حاجة فلازم تكون محضر كويس للبايو والعملى بتاعه حلو جدا بتمسك الميكروسكوب وبتشوف حاجات مبهجة جدا فى الخلايا وكدا
يومك فى السكن أنت اللى بتحدده يكون أزاى. يوم هتلاقى نفسك مش فاضى عشان تنزل تتعشا و يوم هتلاقى نفسك بتخرج تتفسح مع صحابك أو عادة يوم الخميس, ويوم بتنزل تلعب كورة ويوم ممكن تقضيه نوم كامل  وأيام ممكن بتطبق باليوم والاتنين عشان تخلص اللى وراك .ف اليوم ده بتاعك أنت وعلى حسب اللى معاك لو بتخلص أول بأول ومنظم وقتك صح هيفيدك جدا لو لا صدقنى هتتعب جدا جدا