في بداية الكلام ، أولا ألف مبروك لكل ال ستيمرز الجداد ع صولهم للمرحلة دي ، انتو لسة في بداية الطريق فاجتهدوا ..  وان شاء الله تستفادوا خير استفادة من التجربة اللي هتخوضوها في المدرسة .

أحب أبدأ كلامي بإني اعرفكوا ع (ستيم) وبأكد عليكوا ان ستيم مش الجنة ولا النار ستيم مش اجمل مكان تعليم هتقابله ومع ذلك ليست الأسوأ . وان ستيم ليست الهدف . ستيم مجرد الطريق اللي هيساعدك توصل لهدفك .

ستيم منظومة تعليمية هتساعدك تبتكر وتجرب مش تقلد وبس وياريت تستغل وقتك  فيها كويس لانها بتوفر كل الظروف اللي تساعدك انك تبقي افضل دايما.

​

​

اليوم الدراسي

في ستيم بيختلف من مدرسة لمدرسة ومن طالب لطالب .. ولكن هحاول اديكوا ولو نبذة بسيطة عن اليوم

الدراسي بالنسبالي كان ازاي والجو العام في ستيم دقهلية.

كأي مدرسة من مدارس ستيم سنة أول في ستيم دقهلية بدأت بأسبوعين سامر كامب .. دول عبارة عن اسبوعين بيدوكوا زي كورس انجلش صغير وبيساعدوكوا تتعودوا علي النظام الجديد للمدرسة من سيشنز ومواد وكابستون وكل حاجة جديدة هتقابلوها ، بيدوكوا في اول يوم كتاب ضخم للسامر كامب بتتقسموا او على حسب ظروف المدرسة لمجموعات مع مدرسين الانجلش وتبدأوا تاخدوا شوية اساسيات وحاجات تحسن الانجلش بتاعكوا بسرعة ، وممكن ليدرالكابستون ( المسئول عن الكابستون في المدرسة) يقعد معاكوا يشرحلكوا ايه حوار الكابستون وازاي هتشتغلوا فيه .. وكذلك مع مدرسين جميع المواد حتي تبدأ تتعرف اكتر وتفهم نظام المدرسة بالكامل

.

اسبوعين السامر كامب

اهميتهم بتختلف من طالب لطالب .. بس المعظم اتفق ان الانجلش بتاعهم حقيقي مش مفيد للدرجة.

لان حوار انك تذاكر انجلش وكدا بيجي مع التعود والتدريب والوقت . لكن ليه اهمية كبيرة جدا من حيث التهيئ للدخول للمدرسة وفهم الحياة العامة هناك . فمتقلقوش هتفهموا كل حاجة في البداية والموضوع هيكون بسيط بإذن الله ومفهوم ودايما طلبة سنة تانية معاكم بيساعدوكم ويفهموكم اي معضلة في أي وقت.

اليوم الدراسي بقى العادي هناك بيبدأ من بدري علي 6 كدا .. المشرفين بيخبطوا علي الباب لحد ماتصحوا ولو استدعي الأمر بيخشوا يصحوكوا مع العلم انكوا بتبقو 4 او 5 في الاوضة حسب ظروف المدرسة ،  الفطار بيبقي 6 ونص بتخلص وتروح الطابور علي 7 ونص ، في تمارين وبرنامج اذاعي ، وتحية علم لحد ما الطابور بيخلص علي 8. دا الطبيعي بتاع معظم الأيام .. بس الموضوع بيختلف من حيث ان احنا كنا اتناقشنا مع الادارة وقولنالهم ان الفطار كدا بدري جدا عايزين نأخروا شوية فكنا بنروح المدرسة الأول وبنرجع نفطر الساعة 10 . كان في متغيرات كتير في موضوع الفطار بس دا كان الأغلب طول السنة.

بيكون عندكوا حوالي 5 سيشن في اليوم. و 2 بريك واحد نص ساعة والتاني تلت ساعة واوقات خلوه بس 10 دقايق . بس بيكون في الرينج دا يعني ..

كنا بناخد 2 سيشن ونروح بريك نفطر فيه وبعيدن 2 سيشن بعدها البريك التاني وبعدين سيشن وبعدين نروح علي 3 وفي الأغلب كانوا بيخفضوا الوقت ل 2 ونص .

​

السيشنات

واللي بتعمله فيها بتختلف من مادة لمادة ومن مدرس لمدرس . الاستاندر بتاع سيشنات ستيم ان الفصل بيتقسم

مجموعات تشتغل مع بعضها لتفعيل التيم وورك ، وكل جروب بياخد تحضير السيشن مرة ، بيعمل سيرش هو وزمايله في الجروب ويعملوا بريزنتيشن للمعلومات اللي جمعوها وبيشتركوا في تقديمه وشرحه للفصل والمدرس بيراجع ويصحح ويزود لو كلامهم ناقص ويوجههم . وبيعملوا اكتيفتيز وكدا بحيث الطلبة تشارك معاهم .

بعض الأحيان المستر وليكن في مادة زي الماث شايف اننا منقدرش نلم الموضوع لوحدنا فممكن يساعدنا في الشرح والوصول للقوانين وكدا ..

سيشن زي الانجلش كنا بنسمع فيلم للقصة واحيانا بنمثلها هي وقصة العربي والموضوع كان لطيف ، كنا بنعمل فيها اكتيفتيز كتير ونكتب براجرافز كتيرة بشكل مسلي الي حد كبير عشان منزهقش ، مادة زي السوشيال كنا لازم بنجيب خريطة نشرح عليها وقت الجغرافيا والتاريخ كنا أحيانا بنعمل مسرحية مع الشخصيات اللي في المنهج .

فالوضع بيختلف جدا حسب المدرس والطلبة واللي تقدروا تقدموه وتعرضوه وقت السيشن واستغلالكوا ليه وحسن التنظيم والتعاون مابينكوا ، مع العلم ان وقت السيشن 80 دقيقة.

​

المدرسين

في البداية هيفهموكوا تعملوا بريزنتيشن ازاي وتشرحوا في السامر كامب فمفيش حاجة هتبقي صعبة بإذن الله ، هتكسبوا سكيلز كتير من شغل التيم وورك واعتمادكوا ع نفسكوا فى السيرش فاستغلوها واشتغلوا دايما ومتقفوش.

​

بعد انتهاء اليوم الدراسي

​

سواء انتهي 2 ونص او 3 بتروحوا تتغدوا ، بعدها بتطلع اوضتك في السكن مع اصحابك بتصلي .. في ناس ممكن تنام بالنهار وتسهر اكتر ، وناس العكس متنامش بالنهار وتنام باللليل بدري شوية.

بعد كدا بتبدأ تنظم وقتك حسب المطلوب منك في اليوم من مذاكرة واجتماعات كابستون ، ممكن تذاكر شوية والمذاكرة بتكون من ريفرنس او سيرش علي النت حسب الموضوع اللي هتذاكره ، بتشوف لو هتجتمع مع جروب فصلك عشان لو عليك بريزنتيشن في الفصل وتجهزوه مع بعض.

بعد كدا وجبة العشا بتكون الساعة 8 ، ممكن بعدها تذاكر تاني او تشوف لو وراك اجتماع كابستون مع تيم الكابستون اللي بيكون ساعتين او حسب احتياج الجروب .. وعدد الاجتماعات بتختلف من تيم للتاني مرتين في الاسبوع او 3 ، حسب التنظيم بعدها ممكن تنام عشان تصحي تكمل نفس الدورة مع الاختلافات البسيطة الفردية من يوم ليوم ومن طالب لطالب .

في البداية الموضوع هيكون جديد وصعب وخصوصا تنظيم الوقت ، دا طبيعي متقلقوش هتتعودوا .. ممكن بتسهروا ومش لاحقين وخايفين ومتوترين كله عادي لازم هتمروا بكل دا وهتكتسبوا اكسبرينس عالية في حياتكوا وهتغلطوا كتير وهتقعوا بس هتقوموا تاني  وفي الاخر هتلاقوا الموضوع بقى سهل جدا ..

​

اهم حاجة متيأسوش ، متخليش الضغوط تأثر عليكم وتوكلوا علي الله دايما ..

وافتكروا دايما ان احنا معاكوا وهنساعدكوا علي طول بإذن الله . وبالتوفيق ياشباب <3

​

Rawan Saber

​