اولا مبروك انك دخلت ستيم وبقيت ستيمر ...انت كدا عديت شوط لا باس به فى رحلة ستيم .. بس عايزين نبقى متققين كبداية انك مش داخل ارض الاحلام وخلاص كدا طريقك بقى سهل ,^ ستيم يعنى عين فى الجنة وعين فى النار , يعنى السهل الممتنع ^ ودى حاجة مش وحشة اكيد لان اللى عايز يوصل لحاجة لازم هيتعبلها عشان بعدين يحس بالنجاح

 

 summer camp

نبدأ بقى نعرفك على ستيم داخليا اكتر واليوم الدراسى ماشى فيها زاى .
هتبدا طبعا اول اسبوعين سامركامب زى ما انت عارف ولو مش عارف يعنى اييه ف دا عبارة عن زى كورس انجلش بتعمله المدرسة لمدة اسبوعين عشان تهيأك على الدراسة بالانجلش لو انت من مدرسة عربى وهتتعرف خلال الاسبوعين دول على المدرسة والمعامل وهتعرفوا بعض شوية

 من ناحية االسامر كامب فى ناس بتشوفوه مفيد وناس لا, انا هسيبلك الجزئية دى انت اللى تجربها وتحكم عليها بنفسك
 

اليوم الدراسي 

اليوم بيبدا من 6 صباحا او بدرى عن كدا شوية لو انت بتاخد وقت عشان تجهز ,الفطار بيكون 6.5 بعد كدا تروح  الطابور اللى بيبدأ 7 واحيانا بيكون فى تمارين قبله ... بعدين تطلع على السيشن بتاعك اللى مدته 80 دقيقة ... عامة النظام فى ستيم ماشى على اساس العمل الجماعى فبالتالى النظام دا بيبقى متطبق ف السيشن كمان بمعنى ان كل سيشن بيبقى فى جروب هو اللى عليه شرح وتحضير الدرس ويعملوا الانشطة اللى فيه مع باقى الطلبة والمدرس يتابع ولو فى حاجة الطلبة فهموها بطريقة غلط بيصحح ويوجه

 

chemistry session

يعنى مثلا سيشن زى الكيمسترى ...هتحضر الدرس ال عليك انت وجروبك وتجمعوا عنه فيديوهات عشان تساعد برضو ولو فييه تجربه تحضروها وتعرفوا اييه ادواتها وخطواتها وتروحوا تانى يوم تشرحوها  وتعملوا التجربة مع باقى الطلبة وكل دا طبعا تحت اشراف وتوجيه المدرس وهكذا كل السيشنات هتبقى ماشية بالطريقة دى وفى من المدرسين ال بيطبق الكلام دا وفى لا ... فى مثلا اللى بيشوف ان الدرس دا الطلبة مش هتعرف تجمع عنه المعلومات الكافية فبيشرح هو وفى اللى بيخليهم يحاولوا ويجربوا وهو لو عنده اضافات يقولها

.
 

sessions & breaks

 عندك فى اليوم 5 سيشنات  خلالهم فترتين راحة .. واحدة بعد اول سيشنيين مدتها تقريبا عشردقايق ربع ساعة بالكتير , والتانية بعد السيشن الثالث دى بتبقى نص ساعة على معاد الضهر كدا عشان تصليه وبعدين بتاخد السيشنين ال قاعدين ويخلص يومك على 3 
 

بعد المدرسة

هتروح السكن, الغدا بيبدأ 3 قول هتاخد نص ساعة فى الغدا عشان الطابور وكدا  .... بعدين تطلع اوضتك  هتكون تقريبا بقت 4 ولو حابب تنام ساعتين ... باقى الوقت ال قاعدلك تحاول فييه تنظمه كويس جدااا عشان تذاكر اللى اخدته وتحل علييه وتحضر ليوم بكرا ولو كمان هيكون عندك اجتماع كابستون  اللى مش هياخد اقل من ساعتين فلازم طبعا ترتب وقتك وتحدد اولوياتك واييه المهم والاهم منه 

 

العشا

العشا بيكون على 8 وحاول ماتفوتش الوجبات عشان مش هتستلمها الا لو عندك عذر ""لان اكيد الشيف مش تحت امرنا هو كمان وراه شغل يقوم بيه وانت عليك الالتزام بالمواعيد" 
 

تنظيم الوقت

انت كستيمر هتتعلم بمرور الوقت ازاى تنجز ف مذاكرتك و تنظم نفسك على الوقت المتاح ليك اكيد فى الاول هتلاقى حاجات متراكمة عليك بس ان شاء الله واحدة واحدة هتتكيف وتتعود على ضيق الوقت وتنظم امورك .... معاد النوم المفروض 12 بس انا اعتقد انت كستيمر مش هتنام قبل 2 وفى ال بيناموا بعد كدا احيانا وكله برضو على حسب تنظيمه لوقته واييه اللى وراه 
 

اجتماعات الكاب

بالنسبة لاجتماعات الكابستون ف دى بتكون غالبا مرتين فى الاسبوع او اكتر يعنى على حسب انت وجروبك محتاجين تشتغلوا وتتقابلوا مع بعض كل قد اييه,,, بس هى اقل حاجة مرتين فى الاسبوع ويفضل ماتقلش عن كدا عشان تبقوا متابعين الموضوع اول بأول .... خلال الاجتماع الليدر بيشوف كل واحد عمل الشغل اللى عليه ولا لا ولو فى حد مقصر بيتم تبليغ المدرس المسئول عن الكابستون او بتحلوها انتوا مع بعض , وبيقسم الشغل الجديد ويحدد الميعاد لتسليمه , بتتناقشوا فى اللى كل واحد وصل لييه وعمله واييه الجديد فى مشروعكم وتختاروا الافضل ,و تجمعوا المعلومات ال جبتوها فى البورتوفوليو ... 
 بس وبكدا انت يومك بيكون خلص ^^       
نصيحة

تحاول طبعا ماتسهرش اكتر من اللازم او بمعنى اصح فوق طاقتك عشان ماتاثرش بالسلب على اليوم اللى بعده .... ونظام اليوم اللى اتكلمنا عنه بيتكرر كل يوم باختلافات بسيطة يعنى .. يوم انت عليك اجتماع كابستون يوم ااه ويوم لا , يوم عليك فييه مذاكرة كتير ويوم اخف وهكذا.... اهم حاجة زى ما اتفقنا فى البداية تنظيم الوقت والاستعانة بالله والصبر وان شاء الله هتوصل لهدفك 
 

Written by: Reem Diaaeldin

              STEM Assuit