اسمع اسمع اسمع اللى حواليك قبل ما تتكلم حوار انك تتكلم عشان تثبت نفسك ملوش لازمة ^ ^ حط هدفك الاول ازاى تستفاد من اختلاف الجروب وتنمي نفسك اكتر مانت تتكلم  

 

   متشوفش انك اقل من حد وتتكسف تقول رايك ولا تشوف انك اعلى فتحتقر رأي الباقي وتفتكر انك اينشتاين 

 

   لازم تبقى ملتزم فى مواعيدك مع جروبك حتى لو انت مش منظم تيجى عند الكابستون وتنتظم

 

  مش اهم شخصية الليدر الشخصيه المهمة بجد هى الشخصية اللى بتتحمل المسئوليه وتعمل اقصى ما عندها فى اى حاجه تمسكها وتساعد كل الجروب بكل قدرتها

 

  وزعوا التاسكات حسب المهارات يعنى لو حد شاطر جدا فى السيرش اديله جزء مهم ولو حد مصمم حلو هيبقى ليه اهمية كبيرة

 

  لازم تعرف انكوا مختلفين عن بعض فى الثقافات حاجة بالنسبالك عادي بالنسبة لغيرك كبيرة جدا فلازم تحترم دا واحسن الظن

 ماتهتمش بالتاسك بتاعتك وبس المشروع باسمكوا كلكوا فى الاخر وكلكوا لازم تراجعوا شغل بعض عشان ماتتصدمش بردو وقت العرض ^ ^

​

هتلاقى الناس مابتشتغلش ، طبيعي ، لانك من البداية كان مفترض تحط قوانين كلكوا تلتزموا بيها وعقوبات للى ياخر الشغل او ميعملهوش كويس بس بردو نراعي ظروف بعض ومنبقاش ماديين لدرجة ننسي الانسانية

​

اتعامل مع ناس مختلفة كل مرة عشان تاخد اكبر قدر استفادة من المدرسة لو لزقت لجروب وقلت مريحني مش هتتعلم باستثناء 3ث لازم تختار اللى يريحك :D

 اخلق علاقة حب وثقة ووحدة بينكم وصاحب الجروب بس برا الشغل ^ ^ اسال عليهم واعرف مشاكلهم وعاتب الشخصية العنيدة ووبخ الشخصية الملتزمة لما يقصروا

​

  لازم كله يبقي عارف وموضح قدامه الهدف اللي لازم يوصله في وقت معين وياخد عهد علي نفسه انه لازم يحصل

بدل ما تهاجم افهم الاول وجهة نظر اللى قدامك

 

 الاجتماع الناجح : هو اللي بنخرج منه بتوصيات وتاسكات فعالة وبيتحط فيه خطة واضحة للي جاي لمتابعة كل جديد في التيم ومراقبة التوصيات دي وبيقسم وقت الميتنج

ندافع عن بعض ونجمل صورة التيم ومنطلعش العيوب او اى مشاكل برا لان دا هيضر بالفريق

​

  نتعلم من الاخطاء ونشوفها وسيلة للاحسن مش وسيلة لنقد الشخص. ومتحاولش تجادل ف الغلط لو قالولك ان دا غلط وانت عارف كدا اسمع منهم واتعلم منه ومتكررهوش مره تانيه

لازم ندرس الموقف اللى احنا فيه كويس عشان نطلع باكبر مكسب ف الشغل واكبر فائدة للتيم ونكون عاملين حسابنا وحاطين بدائل لكل حاجة ولو هنختار من البدائل نختار ع حسب الاولوية

​

لازم روح التحدى والاصرار يكونوا موجودين ودايما يكون فى تفكير ابداعى

متحاولش تقول ان انت اللى عملت دا ودا حتى لو هو الكل مبهور بيه قول ان دا عملنا كلنا وساهمنا ف النقطه دى مش لوحدك

حفزوا بعض حتى لو الشغل مش بيرفيكت بس التحفيز اهم حاجه ف التيم وورك